Die Demokratiese Republiek van Oppitrokki
(10 Aug 2007)
|
|
KYK HIER NA FO's VAN DIE AAND
So gebeur dit dat Red. toe sommer Woensdagaand die MC word by
Oppitroki. En daarom staan hy terug op die storie oor die aand, net om
dinge bietjie regverdig te hou. Chris Boshoff was vriendelik
genoeg om uit te help - hier is sy verslag van die bands wat bo
geëeindig het op die Oppikoppi Wishlist, en die kans gekry het om by
die Oppitroki pre-fest te speel.
“Hierdie gaan ‘n gereelde instelling word, om opkomende bands te help…”
sê Beyers (een van Oppikoppi se ouderlinge) oor hulle nuwe Beeslorrie
stage. Oppikoppi het ‘n maand voor Oppikoppi ‘n kompetisie geloods vir
nuwe bands om ‘n naam te kom maak by die grootste Rock & Roll fees
in Afrika. Die bands is gekies deur ‘n demokratiese proses waar die
dassies kon stem vir hulle gunsteling bands.
Hier kon Oppikoppi se organiseerders nie geblameer word vir “biased”
opinies nie. Die slotsom is dat demokrasie nie altyd werk nie.
Die wenners:
The Kick:
My eerste gevoel was “cool”. Dit was die vocals van die hoofsanger wat
my aandag eerste gegryp het - soos ‘n baie jong Robert Plant voer hy
die gehoor mee op ‘n Led Zeppelin-soortige trip.
Op die vraag: “Wat dink julle kan hierdie wêreld verbeter?”, antwoord hulle binne 0.003 sekondes “Rock and Roll”.
Falling Short:
As jy in hulle fans se sakke sou gaan krap, is ek seker jy sal ‘n hele
paar Linkin Park T-shirts kry. Hulle sê van hulle invloede is Iron
Maiden, en Rufio. Persoonlik voel ek dat hulle nie iets nuuts doen nie,
en alhoewel hulle songs op MK het hulle kan probeer om eers ‘n naam te
maak voor hulle te arrogant op stage raak. Dit gaan immers hoofsaaklik
oor die musiek - en nie ‘n premature image nie.
Op die vraag oor hoe om die wêreld te verbeter antwoord hulle in vier sekondes “Rock and Roll?”
HiKaToRi:
Seker die gewildste band by Oppitroki, wat hulle invloede lys as
S.O.A.D., Cradle of Filth en NOFX. Hulle antwoord binne een sekonde dat
alkohol die wêreld beter kan maak - en dan nog ‘n sekonde later dat dit
net ‘n grap is. Hulle regte antwoord is uiteindelik na innerlike
refleksie: “Rock and roll”. Hulle hoofmissie is om musiek te maak wat
geniet moet word, en as mens kyk na die reaksie van die gehoor, is
hulle goed op pad na hulle doel.
Newborn Fire:
‘n Metal-band in die klassieke lang-hare-en-swart-klere sin van die
woord. Shaun (‘n Amerikaner) is een van hulle ondersteuners en sê dat
hulle nie so “sleazy” is soos ander metal bands nie en dat hulle unieke
styl hulle in ‘n posisie plaas waar ons meer en meer van hulle sal
hoor. Ek stem saam. As ‘n die-hard Bob Dylan en Howe Gelb fan kan selfs
ek die band se intensiteit en eerlikheid beleef.
Hulle het geen antwoord op hoe mens die wêreld gaan verander nie maar
sê dat hulle doen wat hulle moet en dat alles gaan oor die musiek. Viva
Suid Afrikaanse swaarmetaal...
Rose of Sharon:
Ek stap verby iemand wat sê: “Dit is die slegste band wat ek nog ooit
gehoor het.” Ek vra dadelik vir ene Werner of ek hom mag aanhaal.
Werner luister gereeld na Nirvana, Fokofpolisiekar en The Doors. En ek
stem saam. Demokrasie het ons hier gefaal. ‘n Groot ondersteunerbasis
kon verseker dat jy by Oppitrokki sou speel - en die band weet iets van
marketing wat ander bands duidelik nie weet nie.
Musikaal is hulle vervelig. Hulle dubbel vokale poging sink die band in
die diepste diepste skeure van obskuriteit. As iemand wat in Kaapstad
woon was ek skaam om my hand in die lug te steek toe hulle vra: “Are
there any Capetonians here with us?!”. Ek voel dat hulle die
vooruitstrewende Kaapse rock&roll scene se reputasie gisteraand
beskadig het.
Pierre, een van hulle groupies sê dat hy baie van hulle hou en dat die band “Crazy” is. Pierre se gunsteling band is Incubus.
(Napalma het ook gespeel en hulle het gerock. Baie dankie aan Chris vir die storie en foto's. - Red.) |
|
